Cantà A 'ffigliola Lyrics

Salutammo apprimma 'sta bannera
e doppo tutte quante ce n'esistono
'int''a 'sta bella cummertazione.
Vulessemo sape'
o mille setteciento uttantacinche
o tridece d'aprile che ghiuorno era,
e comme se chiamava
'o primmo cantatore
ca ce ha dettata 'a legge 'e stu
"cantà 'a figliola"...
Vuie m'avite sfidato pe' sape'
o mille setteciento uttantacinche
o tridece d'aprile che ghiuorno era
e 'ì ve risponno ca era venerdì
e 'o primmo cantatore
si vuie nun 'o sapite fuie
Tore 'e Valanza
poi Tore 'e Segretario
e mò prisentemente
chillo ca ve stà 'e fronte
che ha miso sempe 'a coppa
pe' tutt''e feste e p''o
"cantà 'a figliola"....
Fronn''e limone
don Giuvann'''ì sto a servirve pe' canta',
però v'avverto cantate bbuono,
si no sò guaie!
Cucuzzielle!
Femmene belle nun 'nzerrat''e porte
aniello d'aniello,
ca ccà nun stà cantanno 'o lupo vermenaro,
don Tatunniello io pe' canta' ve dongo 'a morte
ve facesse addeventa'
propetamente 'a mazza d''o craparo.
Chine 'e pepe 'e jammere!
E comm'è 'st'evera a palelle
ma comme se magna chest''nzalata,
mentre nuie cantammo 'e cose belle,
smucculiammo 'e cannelotte p''e 'nnammurate.
S'è apierto 'o cielo e 'a terra
fronn''e limone,
'a dinto ce songo asciute tre angele 'ncurunate.
Don Tatunniè nun ghiammo cchiù bbuono
aggio capito ca state ascenno 'a fora d''o semmenato.
'A fora d''o semmenato nun ghiesco
fronn''e limone,
ca 'a cosa è chiara e regulare,
si me ne vaco 'e capa 'a 'stu carugnone
caccio 'o curtiello piglio e 'o 'mparo!
Ma tu a chi 'mpare
fronn''e limone,
ì' tengo voce a Napule 'nfì a Nola,
si tu sì ommo e no guapp''e cartone
fernimmo a legge 'stu
"cantà 'a figliola!"....