Rääts Un Links Vum Bahndamm Lyrics

Rääts un links vum Bahndamm wähß Jestrüpp un Jinster blöht. Duppelkenn met Fachbooch, jetz öm Blickkontakt bemöht. Lesezeichen rinnjelaat, de Brill en et Etui. Tippe op Vertreter un luhr fott: "Nä, hück nit mieh!" Drusse weet Deutschland wach, un unger jedem Dach heiß et jetz he 'n dä Stund: "Ring frei – die nähxte Rund!" Rääts un links vum Bahndamm jonn die Radiowecker ahn; registrierte, glattrasierte Schweiger zur U-Bahn, Zeidunge met News vun jestern, hück schon övverhollt; Zochkellner bring Kaffee – lauwärm – och ejal, wat soll’t? Ich wöhr noch jähn bei dir. Uns Naach jing nur bess vier. Mir hatte kei Aug zo. Dä Grund dofür woors du. Ich sinn dich, wie du vüür mir em Bett sitz un leis "Dat wohr't wohl!?", sähß, dä Rest Kääz ussblööhß, dich zur Wand wegdriehß – sinn dich rääts un links vum Bahndamm. Jestern öm die Zick, do wohre mir 'ns noch unbekannt, mir affjestürzte Ikarusse – dausendfach verbrannt. Wetten, wenn du dat Leed hührs, denks du "Na ja" un grins, weil 't en Naach bliet, die niemohls em Alltagsmüll versink. Friedhöff, Hingerhöff un Bahnhöff, wo dä Zoch nit hält, Wohnblocks, Industriejebiete – 'ne Kettenhung, dä bellt. Tierasyle, Schreberjääde, Kathedrale, Puffs, Penner unger Bröcke, die erdraaren et em Suff. Drusse weet Deutschland wach un unger jedem Dach heiß et jetz he 'n dä Stund: "Ring frei – die nähxte Rund!"