Stadt Em Niemandsland Lyrics

Die Parkbänk sinn zem Övverwintre einjelagert un wie't sching, passiert datselve für die nächste Zick met mir. Hann mich schon lang dodrop jefreut ens widder Woozele ze schlaare – nit, da 'sch seßhaft weede wollt, ich will mich opwärme bei dir. Ich hann mich römmjedrivve, ich hann mich ömjeluhrt. Du bess hejeblevve, klar, du bess he festjemuhrt. Du bess die Stadt, die 'sch nit als Stadt sinn. Du bess Minsche, du bess Stelle, die uss irjendeinem Jrund mir ahn et Hätz jewahßse sinn. Du bess Jeseechter, junge, ahle Lück, bess Zemmer, häss kein Strooße - für mich sinn dat alles Strecke, die 'ch erlevve, sick ich Kind. Du häss mich ussjedraare, du häss mich ussjespeut. Ich hann mich affjenabelt – dat hann ich nie bereut. Stadt em Niemandsland vun Preußen, off erbaut un off zerstört. Zweimohl dausend Johr möht heiße: "Dann un wann dozojeliert." Ahl Diva, egozentrisc,h eitel, komplimentesüchtig, selvsverlieb – jraad su, als ob du 't wirklich nüüdisch hätts. Met dingem Dom vun Kaisers Gnaden, dinger Altstadt, die du "tüchtig" ussverkauf häss - treudoof läufste jedem Stenz en't off'ne Mäzz. Dat fingste och noch clever! Du denks, dat möht mer jetz. Hühr zo: Dat jeht donevve, su wie du dich affhetz. Do 's uns're Karneval, en dämm du – zur Unkenntlichkeit verstümmelt – dich ahn Bonze ranschmieß, Ostermann ahn "Elferrööt" verrööts. Wa 'sch met der decke Trumm verbinge, besste stekum weg ahm Klüngle. Et ess schon hatt metahnzesinn, wie du öm Weltstadtflair bemöht bess. Häss du dich opjejovve, ...dat, wat ding Seel ussmäht? Du häss dich schwer verhovve, ding Lächeln wirk jequält. Gläuv mir ahl Mädche, ei'ntlich sollt dat Leed he saare, da 'sch dich jähn hann – dich un ding Pänz jrooß un klein, doch "wenn ich ahn ming Heimat denke", rebelliert jet bei mir m'Maare. Wenn ich op Stromlinie afführ, wöhr 'sch anderswo doheim! Du häss mich ussjedraare, du häss mich ussjespeut. Un wenn 'sch op Heim anfahre, ha'sch dat noch nie bereut.